ᑕᕐᕋᒥᐅᑦ ᓂᐱᖓᑦ
ᐱᐅᓯᕆᓯᒪᔭᖓᑦ
1970 ᐊᕐᕌᒍᐃᑦ ᐱᒋᐊᕐᖃᒥᐅᑎᓪᓗᒋᑦ, ᐃᓄᑐᐃᓐᓇᖁᑎᖏᑦ ᑕᕐᕋᖓᓂ ᑯᐱᐊᒃ— ᓄᓇᕕᐅᓂᕋᕐᑕᐅᓲᖑᓕᕐᑐᒥᒃ – ᐃᓕᑕᕐᓯᓂᖃᓕᕐᓂᒪᑕ ᑐᓴᐅᒪᐅᑎᖃᑎᒌᒋᐊᖃᓕᕐᓂᒥᓂᑦ ᓄᓇᓕᓕᒫᒥᑎᒍᑦ. ᑌᒣᓐᓂᑯᖓᓄᑦ, ᑕᕐᕋᒥᐅᑦ ᓂᐱᖔᑦ (TNI) , ᑐᑭᓕᒃ ᓂᐱᖓᑦ ᑕᕐᕋᒥ, ᐱᖕᖑᑎᑕᐅᓕᕐᓂᖁᖅ 1975ᒥ. ᐅᓪᓗᒥᒃ, TNI ᐱᒍᑦᔨᓂᖃᕐᐸᓕᕐᑐᖅ ᐃᓄᑐᐃᓐᓇᓂᒃ ᓄᓇᕕᒻᒥ ᓈᓚᐅᑎᑎᒍᑦ ᑕᑯᓐᓇᒐᑦᓴᓕᐅᕐᓂᑎᒍᓗ ᓲᕐᓗ ᑕᓚᕖᓴᒃᑯᑦ.
ᓯᑉᑎᒻᐱᕆ 1975ᒥ, TNI ᐃᖕᑯᐊᐳᕇᑕᐅᓕᕐᓂᖁᖅ, ᖃᖏᕐᓂᑯᓕᐅᕐᑎᓴᔭᐅᒐᓂ, ᐊᑖᓂ, ᒪᕐᕈᐃᓕᖓᔫᑉ ᑲᓇᑕᒥ ᖃᖏᕐᓂᑯᓕᐅᕕᖃᕐᓂᒧᑦ ᑯᐊᐳᕇᓭᑦ ᐱᖁᔭᖓᓄᑦ. ᓯᑉᑎᒻᐱᕆ 25ᖑᑎᓪᓗᒍ, 2014, ᐱᓕᕐᓂᕆᕗᖅ ᓇᓗᕐᓯᒍᑎᒥᒃ ᑲᔪᓯᐅᒐᕐᓂᐊᓕᕐᓂᒥᒃ ᐊᓯᐊᒎᕐᓂᐊᓕᕐᓗᓂᓗ ᑲᓇᑕᒥ ᖃᖏᕐᓂᑯᓕᐅᕐᑎᔭᐅᖕᖏᑐᐃᑦ ᑯᐊᐳᕇᓭᑦ ᐱᖁᔭᖓᓃᓂᐊᓕᕐᓗᓂ. TNI ᓇᓪᓕᐅᓂᕐᓯᐅᓂᖃᓛᕐᓂᐊᓕᕐᓱᓂᓗ 50ᓂᒃ ᐊᕐᕌᒍᓂᒃ.
ᓈᓚᐅᑎᒃ
TNI ᐊᐅᓚᑦᓯᕙᓕᕐᑐᑦ ᓇᒻᒥᓂᖁᑎᒥᓂᑦ ᓄᓇᓕᓕᒫᑎᒍᑦ ᓈᓚᐅᑎᖃᕐᓂᒥᒃ 2006ᒥᓂᑦ. ᓈᓚᐅᑎᖓᑦ, 94.1 FM ᑐᓵᔭᐅᓲᖅ ᓄᓇᕕᐅᒃ ᓄᓇᓕᖁᑎᖏᓐᓄᑦ 14ᓄᑦ, ᐅᔭᕋᕐᓂᐊᕕᒻᒥ, TNIᑯᓗ ᖃᕆᑕᐅᔭᓕᕆᐅᑎᖓᑎᒍᑦ www.tni-rtn.com, ᑐᓴᕐᓴᐅᒐᔪᓲᖑᑦᓱᑎᓗ 12 ᐃᑲᐅᕐᓂᓂᒃ ᐅᓪᓗᑕᒫᑦ, ᐱᖓᓲᔪᕐᑐᓂᒃ ᐅᓪᓗᓂ ᐱᓇᓱᐊᕈᓯᑕᒫᑦ, 3,000 ᐃᑲᐅᕐᓂᓂᒃ ᐅᑭᐅᓕᒫᖅ. TNIᑯᑦ ᓅᑕᓂᒃ ᑐᓴᕋᑦᓴᓂᒃ ᐱᖕᖑᐃᓲᖅ ᐱᓇᓱᐊᕈᓯᑕᒫᑦ ᐊᒥᓱᑲᓪᓚᓂᓗ ᓂᐱᓕᐅᕆᓲᖑᑦᓱᓂ ᐊᑑᑎᔭᐅᔪᓂᑦ ᓄᓇᕕᒻᒥ. TNIᑯᑦ ᓇᓚᐅᑎᒃᑰᑕᕐᓂᖓᑦ ᐃᓄᒃᑎᑑᕐᐸᑐᖅ.
ᐊᑐᓂᒃ ᓄᓇᕕᒻᒥ ᓄᓇᓕᐅᔪᑦ ᐊᐅᓚᑦᓯᓲᖑᒻᒥᔪᑦ ᑐᓴᐅᑎᖁᑎᒥᓂᑦ. ᐃᓘᓐᓇᑲᓵᑎᒃ ᑲᕙᒫᐱᒃᑯᓄᑦ ᐊᐅᓚᑕᐅᓲᖑᒐᓱᐊᕐᑎᓗᒋᑦ, TNI ᐱᓪᓗᑯᑦᑕᐅᔭᒋᐊᓕᓐᓂᒃ ᐃᑲᔪᕐᓯᓂᖃᓲᑦ.
ᑕᓚᕖᓴᒃ
ᑕᕐᕋᒥᐅᑦ ᓂᐱᖓᑦ ᑕᑯᓐᓇᕋᑦᓴᓕᐅᖃᑦᑕᓯᒪᓕᕐᑐᖅ ᓄᓇᓕᓕᒫᓂ (ᓄᓇᕕᒻᒨᓕᖓᔪᓂᒃ, ᐃᓄᑐᐃᓐᓇᓅᓕᖓᔪᓂᒃ, ᐊᒻᒪᓗ ᓄᓇᕐᔪᐊᓕᒫᒥ ᐅᑭᐅᕐᑕᑐᒨᓕᖓᔪᓂᒃ) ᑕᓚᕖᓴᒃᑰᑐᑦᓴᓂᒃ ᓄᓇᕕᒻᒥᐅᓅᓕᖓᔪᓂᒃ 40 ᐊᕐᕌᒍᐃᑦ ᐅᖓᑖᓄᑦ. ᑕᑯᓐᓇᕋᑦᓭᑦ ᓄᐃᑕᑎᑕᐅᓲᑦ APTN-ᑯᑦ ᐊᒻᒪᓗ ᐱᒋᐊᕐᖃᒥᖅ ᐅᕙᒍᑦ ᑕᑯᓐᓇᕋᑦᓴᓕᐅᕐᑎᑯᑎᒍᑦ. ᐊᒻᒪᓗ ᖃᒻᒥᐅᓚᐅᕐᑐᖅ ᑎᑭᑦᓱᒍ, ᑕᕐᕋᒥᐅᑦ ᓂᐱᖓᑦ ᑕᑯᓐᓇᕋᑦᓴᓕᐅᖃᑦᑕᓚᐅᔪᖅ ᐊᒻᒪᓗ ᓄᐃᑕᑎᑦᓯᓱᓂ ᑕᑯᓐᓇᕋᑦᓴᓂᒃ ᓄᓇᓖᑦ ᑕᓚᕖᓴᖓᑎᒍᑦ NCTv-ᑯᑦ.
ᑐᕌᒐᒻᒪᕆᖓ
ᑕᑯᑦᓴᐅᑎᑦᓯᔨ ᑐᓴᕈᑎᑎᒍᑦ ᐃᓗᕐᖁᓯᖓᓐᓂᒃ, ᖃᓄᐃᑦᑑᓂᖏᓐᓂᒃ ᐃᓄᐃᑦ, ᐃᓄᓐᓄᑦ
ᓴᕐᕿᑎᑕᐅᑦᓱᓂ, ᑐᕌᕐᓱᓂ ᐃᓄᓐᓄᑦ, ᑲᓇᑕᒥᐅᓄᑦ, ᓯᓚᕐᔪᐊᒥᐅᓄᓐᓗ.
ᑎᓕᔭᐅᒪᐅᑎᖓ
ᑎᓕᔭᐅᒪᐅᑎᖃᕐᑐᒍᑦ ᑐᓴᕈᑎᑎᒍᑦ ᐱᒍᑦᔨᓂᖃᕐᓂᐊᓱᑕ ᐃᓄᓐᓂᒃ ᑯᐸᐃᒃ ᑕᕐᕋᖓᓂᒥᐅᓂᒃ, ᓲᖑᓯᓕᐅᒥᖁᓪᓗᒍ ᐅᖃᐅᓯᖓᑦ ᑲᐃᓪᓗᑐᕐᓗᒍᓗ ᐃᓗᕐᖁᓯᑐᖃᖅ ᐅᓪᓗᒥᐅᓕᕐᑐᓗ ᐃᓄᐃᑦ ᐃᓗᕐᖁᓯᖓᑦ.
ᑐᕌᒐᖏᑦ
ᐊᑐᓕᕐᑎᑕᐅᔪᕕᓃᑦ ᑲᑎᖕᖓᔨᓄᑦ ᑏᓯᒻᐱᕆ 17, 2013-ᒥ
- ᐊᑐᐃᓐᓇᕈᕐᑎᕆᖃᑦᑕᓂᐊᕐᓗᓂ ᓄᐃᑦᓯᖃᑦᑕᓂᐊᕐᓗᓂᓗ ᓱᓇᒥᑦᓯᓯᐊᕐᑐᓂᒃ ᑐᓴᕋᑦᓴᑎᒍᑦ ᑐᓵᔭᐅᔪᑦᓴᓂᒃ ᑯᐸᐃᑉ ᑕᕐᕋᖓᓂᒥᐅᓄᑦ ᐃᓄᓐᓅᓕᖓᔪᓂᒃ ᓄᐃᑎᕆᖃᑦᑕᓂᐊᕐᓗᓂᓗ ᑲᐃᓪᓗᑐᕈᑎᖃᕐᓗᓂᓗ ᓄᐃᑕᐅᔪᑦᓴᓂᒃ ᐃᓘᓐᓇᖏᑎᒍᑦ ᑐᓴᕋᑦᓴᓕᐅᕐᕕᐅᔪᕐᑎᒍᑦ;
- ᑐᓴᕋᑦᓴᑎᒍᑦ ᐃᓄᐃᑦ ᐅᖃᐅᓯᖓᑕ ᐃᓗᖁᓯᖓᑕᓗ ᑕᐅᑐᑦᑕᐅᓂᖓᓂᒃ ᓄᐃᑕᓕᐅᒥᑎᑦᓯᓗᓂ ᐃᓄᐃᑦ ᐃᓗᓯᒥᑎᒍᑦ ᐱᓂᐊᕐᓂᕆᕙᑦᑕᖏᓐᓂᒃ;
- ᓄᐃᑕᑎᑦᓯᔨᐅᓗᓂ ᑐᓴᐅᒪᔭᐅᑎᑦᓯᓂᒃᑯᑦ ᑲᓇᑕᓕᒫᒥ ᐃᓄᐃᑦ ᐱᐅᓯᖓᓂᒃ ᑐᑭᓯᒪᔭᐅᓂᕆᒋᐊᓕᖓ ᐃᓘᓐᓇᐃᓄᑦ ᐱᕈᕐᑎᒐᓱᐊᕐᓗᒍ;
- ᐃᓚᐅᑎᑦᓯᖃᑦᑕᓗᓂ ᐱᒋᐅᕐᓴᑎᑦᓯᖃᑦᑕᓗᓂᓗ ᐃᓅᓱᑦᑐᓂᒃ ᑐᓴᕋᑦᓴᓕᕆᔨᖕᖑᖁᓗᒋᑦ ᑎᒥᖁᑎᒥᓂ;
- ᑐᓴᐅᒪᔭᐅᑎᑦᓯᔨᐅᓗᓂ ᑲᐃᓪᓗᐊᕈᑎᒋᓗᒋᓪᓗ ᑐᓴᐅᒪᑎᑦᓯᒍᑎᑦᓴᐃᑦ ᐊᓯᖏᓐᓂᒃ ᓄᓇᓕᑐᖃᕐᓂᒃ ᓄᓇᓕᓐᓂᒃ ᐊᑦᔨᒌᖏᑐᓂ ᐊᒥᐊᔨᑲᐅᑉ ᑕᕐᕋᖓᓂ;
- ᓄᐊᑦᓯᔨᐅᓗᓂ ᑐᓴᕐᑕᐅᑎᑦᓯᔨᐅᓗᓂᓗ ᑐᓴᕐᑎᓯᒍᑎᐅᒋᐊᓕᓐᓂᒃ ᐃᓗᕐᖁᓯᕐᒧᐊᖓᔪᓂᒃ, ᐃᓅᓯᕐᒨᓕᖓᔪᓂᒃ, ᐃᓕᓐᓂᐊᓂᕐᒧᑦ, ᐱᓂᐊᕐᓂᓕᕆᓂᕐᒧᑦ ᓇᒻᒥᓂᕐᓗ ᒪᑭᑕᒐᓱᐊᕐᓂᒧᑦ ᐱᕙᓪᓕᐊᓂᕐᓂᒃ ᐃᓄᓐᓄᑦ ᑯᐸᐃᒻᒥᐅᓄᑦ;
- ᐱᕙᓪᓕᐊᑎᑦᓯᓗᓂ ᐃᓄᐃᑦ ᑯᐸᐃᑉ ᑕᕐᕋᖓᓂᒥᐅᑦ ᐃᓕᑦᓯᕙᓪᓕᐊᒍᑎᒋᒍᓐᓇᑕᖏᓐᓂᒃ ᑐᓴᐅᒪᔭᑎᑦᓯᒍᑎᖏᑦ ᐃᓄᑦᑎᑑᕐᑎᓗᒋᑦ;
- ᑐᓴᐅᒪᑎᑦᓯᒍᑎᖃᖃᑦᑕᓗᓂ ᐱᓇᐃᓗᑦᓯᑕᐃᓕᒍᑎᑦᓴᓂᒃ ᐃᓅᓱᑦᑐᓄᑦ ᐅᕕᒃᑲᓄᑦ ᐃᓚᒌᓄᓪᓗ ᐊᑐᕐᓗᒋᑦ ᐊᑦᔨᒌᖏᑐᖅ ᑐᓴᐅᒪᑎᑦᓯᒍᑏᑦ;
- ᐊᓯᖏᓐᓂᓗ ᐱᓂᐊᕐᓂᖃᖃᑦᑕᓗᓂ ᑐᓴᕋᑦᓴᓕᕆᓂᕐᒧᐊᖓᔪᓂᒃ ᐱᕙᓪᓕᖁᑎᐅᓂᐊᕐᓗᑎᒃ ᑐᕌᒐᓕᐊᖑᒪᔪᓄᑦ ᑎᑭᐅᑎᒐᓱᐊᕐᓂᒧᑦ, ᐱᔪᓐᓇᓂᖓᓗ ᑯᐊᐱᕇᓴᐅᑉ ᐊᑑᑎᔭᐅᑎᑦᓯᒋᐊᖃᕐᓂᖓᓄᑦ.